muddat se kisi Thahri hui aab-o-hawa mein

muddat se kisī Thahrī huī āb-o-havā meñ

zinda huuñ yahāñ zahr bharī āb-o-havā meñ

achchhā nahīñ lagtā hai magar ai shab-e-hijrāñ

tahlīl to honā hai isī āb-o-havā meñ

us ko bhī na lag jaa.e kisī hijr kī dīmak

ik vasl jo raushan hai tirī āb-o-havā meñ

jis haal meñ huuñ ye bhī mayassar nahīñ sab ko

maanā ki vo lazzat na rahī āb-o-havā meñ

shādāb nahīñ hoñge kabhī ḳhvāb hamāre

har chand ki raushan haiñ khulī āb-o-havā meñ

maiñ apnī taraf baḌhne lagā aap hī 'aḳhtar'

kyā josh-e-aqīdat thā na.ī āb-o-havā meñ

muddat se kisi Thahri hui aab-o-hawa mein

zinda hun yahan zahr bhari aab-o-hawa mein

achchha nahin lagta hai magar ai shab-e-hijran

tahlil to hona hai isi aab-o-hawa mein

us ko bhi na lag jae kisi hijr ki dimak

ek wasl jo raushan hai teri aab-o-hawa mein

jis haal mein hun ye bhi mayassar nahin sab ko

mana ki wo lazzat na rahi aab-o-hawa mein

shadab nahin honge kabhi KHwab hamare

har chand ki raushan hain khuli aab-o-hawa mein

main apni taraf baDhne laga aap hi 'aKHtar'

kya josh-e-aqidat tha nai aab-o-hawa mein