مدت سے کسی ٹھہری ہوئی آب و ہوا میں

مدت سے کسی ٹھہری ہوئی آب و ہوا میں

زندہ ہوں یہاں زہر بھری آب و ہوا میں

اچھا نہیں لگتا ہے مگر اے شب ہجراں

تحلیل تو ہونا ہے اسی آب و ہوا میں

اس کو بھی نہ لگ جائے کسی ہجر کی دیمک

اک وصل جو روشن ہے تری آب و ہوا میں

جس حال میں ہوں یہ بھی میسر نہیں سب کو

مانا کہ وہ لذت نہ رہی آب و ہوا میں

شاداب نہیں ہوں گے کبھی خواب ہمارے

ہر چند کہ روشن ہیں کھلی آب و ہوا میں

میں اپنی طرف بڑھنے لگا آپ ہی اخترؔ

کیا جوش عقیدت تھا نئی آب و ہوا میں