muddaten ho gai hota nahin phera tera

muddateñ ho ga.ī hotā nahīñ pherā terā

tā.ir-e-hosh kahāñ ab hai baserā terā

chhāvnī Daal ke duniyā meñ rahegā kab tak

ḳheme rah jā.eñge uTh jā.egā Derā terā

rahtī hai shams-o-qamar ko tire saa.e kī talāsh

raushnī DhūñDhtī phirtī hai añdherā terā

khaa.e jaatī hai abhī sho.ala-mizājī ai sham.a

din se pahle huā jaatā hai saverā terā

phaaḌ kar pheñkte haiñ jāma-e-hastī ko sameT

le junūñ ham ne ye sāmān bikherā terā

maiñ hī terā huuñ to phir kyā kahūñ merā kyā hai

tū hī merā hai to phir kis liye merā terā

dekhnā 'nātiq'-e-shorīda ko pherī vaale

kūcha-e-yār meñ ho ab ke jo pherā terā

muddaten ho gai hota nahin phera tera

tair-e-hosh kahan ab hai basera tera

chhawni Dal ke duniya mein rahega kab tak

KHeme rah jaenge uTh jaega Dera tera

rahti hai shams-o-qamar ko tere sae ki talash

raushni DhunDhti phirti hai andhera tera

khae jati hai abhi shoala-mizaji ai shama

din se pahle hua jata hai sawera tera

phaD kar phenkte hain jama-e-hasti ko sameT

le junun hum ne ye saman bikhera tera

main hi tera hun to phir kya kahun mera kya hai

tu hi mera hai to phir kis liye mera tera

dekhna 'natiq'-e-shorida ko pheri wale

kucha-e-yar mein ho ab ke jo phera tera