مدتوں بعد وہ خوشبو کی طرح آئے گا

مدتوں بعد وہ خوشبو کی طرح آئے گا

میرا اجڑا ہوا گھر پھر سے مہک جائے گا

اس کے رونے کا بھی انداز بڑا پیارا ہے

وہ کسی طرح سے دل کو مرے پگھلائے گا

ٹوٹ ہی جاتا یہ شیشہ تو نہ ہوتا احساس

کیا خبر تھی کہ وہ رستے میں بچھڑ جائے گا

تو جو میرا نہ ہوا آس نہ ٹوٹی میری

اک ترا غم ہی مرے دل کو بہت بھائے گا

اس کے جانے کا کوئی غم تو نہیں ہے مجھ کو

جانے اب اور وہ کب تک مجھے ترسائے گا

جاگ اٹھے گا جو احساس کسی دن افسرؔ

میرے اندر کا یہ فنکار ابھر آئے گا