muddaton socha kiya kahne ko kuchh

muddatoñ sochā kiyā kahne ko kuchh

phir bhī mujh se kyā banā kahne ko kuchh

jis ke muñh meñ hī zabāñ hotī na thī

aaj vo bhī aa gayā kahne ko kuchh

zabt ne mujh ko na kuchh kahne diyā

dard thā kab se uThā kahne ko kuchh

jo bhī aayā muñh meñ vo tum kah ga.e

tum ne ab chhoḌā hai kyā kahne ko kuchh

tum ne jab tark-e-ta.alluq kar liyā

kyoñ bachāte ho bhalā kahne ko kuchh

vo milā lekin maiñ kyā kahtā use

us ke aage thā hī kyā kahne ko kuchh

kab tū guzregā idhar se ai ḳhudā

maiñ huuñ sadiyoñ se khaḌā kahne ko kuchh

'rāz' ab kyā pūchhte ho maut se

zindagī ne kyā diyā kahne ko kuchh

muddaton socha kiya kahne ko kuchh

phir bhi mujh se kya bana kahne ko kuchh

jis ke munh mein hi zaban hoti na thi

aaj wo bhi aa gaya kahne ko kuchh

zabt ne mujh ko na kuchh kahne diya

dard tha kab se uTha kahne ko kuchh

jo bhi aaya munh mein wo tum kah gae

tum ne ab chhoDa hai kya kahne ko kuchh

tum ne jab tark-e-talluq kar liya

kyon bachate ho bhala kahne ko kuchh

wo mila lekin main kya kahta use

us ke aage tha hi kya kahne ko kuchh

kab tu guzrega idhar se ai KHuda

main hun sadiyon se khaDa kahne ko kuchh

'raaz' ab kya puchhte ho maut se

zindagi ne kya diya kahne ko kuchh