mufahamat na sikha jabr-e-narawa se mujhe

mufāhamat na sikhā jabr-e-nāravā se mujhe

maiñ sar-ba-kaf huuñ laḌā de kisī balā se mujhe

zabāñ ne jism kā kuchh zahr to ugal Daalā

bahut sukūn milā talḳhī-e-navā se mujhe

rachā huā hai badan meñ abhī surūr-e-gunāh

abhī to ḳhauf nahīñ aa.egā sazā se mujhe

maiñ ḳhaak se huuñ mujhe ḳhaak jazb kar legī

agarche saañs mile umr bhar havā se mujhe

ġhizā isī meñ mirī maiñ isī zamīñ kī ġhizā

sadā phir aatī hai kyuuñ parda-e-ḳhalā se mujhe

maiñ jī rahā huuñ abhī ai zamīn-e-ādam-ḳhor

abhī to dekh na tū itnī ishtihā se mujhe

bikhar chukā huuñ maiñ ab mujh ko mujtam.a kar le

tū ab sameT bhī apnī kisī sadā se mujhe

maiñ mar rahā huuñ phir aa.e sadā-e-kun-fayakūñ

banāyā jaa.e miTā ke phir ibtidā se mujhe

maiñ sar-ba-sajda huuñ ai 'shimr' mujh ko qatl bhī kar

rihā.ī de bhī ab is ahd-e-karbalā se mujhe

maiñ kuchh nahīñ huuñ to phir kyuuñ mujhe banāyā gayā

ye pūchhne kī ijāzat to ho ḳhudā se mujhe

maiñ reza reza badan kā uThā rahā huuñ 'adīm'

vo toḌ hī to gayā apnī iltijā se mujhe

mufahamat na sikha jabr-e-narawa se mujhe

main sar-ba-kaf hun laDa de kisi bala se mujhe

zaban ne jism ka kuchh zahr to ugal Dala

bahut sukun mila talKHi-e-nawa se mujhe

racha hua hai badan mein abhi surur-e-gunah

abhi to KHauf nahin aaega saza se mujhe

main KHak se hun mujhe KHak jazb kar legi

agarche sans mile umr bhar hawa se mujhe

ghiza isi mein meri main isi zamin ki ghiza

sada phir aati hai kyun parda-e-KHala se mujhe

main ji raha hun abhi ai zamin-e-adam-KHor

abhi to dekh na tu itni ishtiha se mujhe

bikhar chuka hun main ab mujh ko mujtama kar le

tu ab sameT bhi apni kisi sada se mujhe

main mar raha hun phir aae sada-e-kun-fayakun

banaya jae miTa ke phir ibtida se mujhe

main sar-ba-sajda hun ai 'shimr' mujh ko qatl bhi kar

rihai de bhi ab is ahd-e-karbala se mujhe

main kuchh nahin hun to phir kyun mujhe banaya gaya

ye puchhne ki ijazat to ho KHuda se mujhe

main reza reza badan ka uTha raha hun 'adim'

wo toD hi to gaya apni iltija se mujhe