muft hai KHun-e-jigar azmat-e-kirdar ke sath

muft hai ḳhūn-e-jigar azmat-e-kirdār ke saath

ashk milte haiñ yahāñ dīda-e-bedār ke saath

ham ne māñgā thā sahārā to milī is kī sazā

ghaTte baḌhte rahe ham sāya-e-dīvār ke saath

aaj to hazrat-e-nāseh bhī lipaT kar mujh se

raqs karte rahe zanjīr kī jhankār ke saath

dil-e-barbād pe hai sāya-fagan yaad tirī

sāya-e-fazl-e-ḳhudā jaise gunahgār ke saath

dil meñ us shahr ke kuchh aks abhī baaqī haiñ

luT ga.e ham bhī jahāñ garmi-e-bāzār ke saath

aisī bastī se to vo dasht kahīñ behtar thā

aable mil ke jahāñ rote the har ḳhaar ke saath

ab to ik ḳhvāb sī lagtī hai haqīqat ye bhī

rabt thā ham ko kisī yār-e-tarah-dār ke saath

dil meñ mere bhī yaqīñ aur gumāñ saath rahe

jaise inkār tire lab pe hai iqrār ke saath

aise anmol na the ham ki na bikte lekin

do qadam chal na sake apne ḳharīdār ke saath

hāsil-e-fan haiñ 'farīdī' vahī ash.ār-e-ġhazal

ḳhūn-e-dil jin meñ ho rañgīnī-e-afkār ke saath

muft hai KHun-e-jigar azmat-e-kirdar ke sath

ashk milte hain yahan dida-e-bedar ke sath

hum ne manga tha sahaara to mili is ki saza

ghaTte baDhte rahe hum saya-e-diwar ke sath

aaj to hazrat-e-naseh bhi lipaT kar mujh se

raqs karte rahe zanjir ki jhankar ke sath

dil-e-barbaad pe hai saya-fagan yaad teri

saya-e-fazl-e-KHuda jaise gunahgar ke sath

dil mein us shahr ke kuchh aks abhi baqi hain

luT gae hum bhi jahan garmi-e-bazar ke sath

aisi basti se to wo dasht kahin behtar tha

aable mil ke jahan rote the har KHar ke sath

ab to ek KHwab si lagti hai haqiqat ye bhi

rabt tha hum ko kisi yar-e-tarah-dar ke sath

dil mein mere bhi yaqin aur guman sath rahe

jaise inkar tere lab pe hai iqrar ke sath

aise anmol na the hum ki na bikte lekin

do qadam chal na sake apne KHaridar ke sath

hasil-e-fan hain 'faridi' wahi ashaar-e-ghazal

KHun-e-dil jin mein ho rangini-e-afkar ke sath