muhasba kiya na jae is mein kis ka kya gaya

muhāsba kiyā na jaa.e is meñ kis kā kyā gayā

na mujh se hī rahā gayā na us se kuchh sahā gayā

ye dil se dil kā vāsta bhī kitnā dil-fareb hai

jagī hai dil meñ raushnī ki terā dard bhā gayā

ye kis ke naqsh-e-pā pe sab ne e.atibār kar liyā

ye kaun pesh-rau banā ki rāsta banā gayā

nazar milā ke us se merī baat tak nahīñ huī

mire muāmle meñ jaane kaun kyā lagā gayā

abhī bhī merī jeb meñ hai raushnī bachī huī

añdherā kis umiid par mire qarīb aa gayā

ye niil mujh se kah rahā hai tanz kī zabān meñ

vahāñ pe jā sadā lagā jahāñ tirā asā gayā

mujhe pata nahīñ malak ki kis maqām par huuñ maiñ

zabāñ se jo nikal ga.ī use adab likhā gayā

muhasba kiya na jae is mein kis ka kya gaya

na mujh se hi raha gaya na us se kuchh saha gaya

ye dil se dil ka wasta bhi kitna dil-fareb hai

jagi hai dil mein raushni ki tera dard bha gaya

ye kis ke naqsh-e-pa pe sab ne eatibar kar liya

ye kaun pesh-rau bana ki rasta bana gaya

nazar mila ke us se meri baat tak nahin hui

mere muamle mein jaane kaun kya laga gaya

abhi bhi meri jeb mein hai raushni bachi hui

andhera kis umid par mere qarib aa gaya

ye nil mujh se kah raha hai tanz ki zaban mein

wahan pe ja sada laga jahan tera asa gaya

mujhe pata nahin malak ki kis maqam par hun main

zaban se jo nikal gai use adab likha gaya