muhit misl-e-asman zamin-e-fikr-o-fan pe hun

muhīt misl-e-āsmāñ zamīn-e-fikr-o-fan pe huuñ

sukūt kā sabab hai ye maqām-e-lā-suḳhan pe huuñ

fazā-e-lā-sabāt meñ sarā-e-be-jihāt meñ

musāfirāna ḳhanda-rez vaqt kī thakan pe huuñ

mire nasīb kī sahar ġhurūb ho ga.ī kahāñ

nazar jamā.e der se tirī kiran kiran pe huuñ

sajā.ūñ vo chaman jinheñ ḳhizāñ kabhī na chhū sake

tirī tarah jo hukmarāñ shaguft har chaman pe huuñ

azīz-tar hai tesha-e-hunar ġhubār-e-dard se

tarīq-e-qais par nahīñ tarīq-e-koh-kan pe huuñ

hujūm-e-sad-ḳhayāl se najāt mil sake agar

to hāsidāna mo'tariz kisī kī anjuman pe huuñ

visāl hī visāl hai firāq ab muhāl hai

maiñ tere har libās kī tarah tire badan pe huuñ

kisī ke shajra-e-suḳhan se nisbat-e-suḳhan nahīñ

maiñ aap apnā mudda.ī siyādat-e-suḳhan pe huuñ

muhit misl-e-asman zamin-e-fikr-o-fan pe hun

sukut ka sabab hai ye maqam-e-la-suKHan pe hun

faza-e-la-sabaat mein sara-e-be-jihat mein

musafirana KHanda-rez waqt ki thakan pe hun

mere nasib ki sahar ghurub ho gai kahan

nazar jamae der se teri kiran kiran pe hun

sajaun wo chaman jinhen KHizan kabhi na chhu sake

teri tarah jo hukmaran shaguft har chaman pe hun

aziz-tar hai tesha-e-hunar ghubar-e-dard se

tariq-e-qais par nahin tariq-e-koh-kan pe hun

hujum-e-sad-KHayal se najat mil sake agar

to hasidana mo'tariz kisi ki anjuman pe hun

visal hi visal hai firaq ab muhaal hai

main tere har libas ki tarah tere badan pe hun

kisi ke shajra-e-suKHan se nisbat-e-suKHan nahin

main aap apna muddai siyaadat-e-suKHan pe hun