muhtaj-e-did-o-jalwa karun kyun nazar ko main

muhtāj-e-dīd-o-jalva karūñ kyuuñ nazar ko maiñ

nazroñ meñ khīñch laatā huuñ jab jalva-gar ko maiñ

dekhūñ to jurm aur na dekhūñ to kufr hai

ab kyā kahūñ jamāl-e-ruḳh-e-fitna-gar ko maiñ

aisā nahīñ ki dil meñ mire zaḳhm hī na ho

āñkhoñ meñ rok letā huuñ ḳhūn-e-jigar ko maiñ

dāmān-e-sabr chhūTne lagtā hai haath se

jab dekhtā huuñ dūrī-e-shām-o-sahar ko maiñ

manzil pe aa ke aaj ye samjhā ki aaj tak

manzil samajh rahā thā faqat rahguzar ko maiñ

manzil kī justujū meñ na jaane kahāñ kahāñ

sar par liye phirā huuñ ġhubār-e-safar ko maiñ

ik qasr-e-ārzū thā girā TuuT TuuT kar

hasrat se dekhtā rahā dīvār-o-dar ko maiñ

milne ko 'nūr' yuuñ to bahut ġham yahāñ mile

tarsā tamām umr ġham-e-mo'tabar ko maiñ

muhtaj-e-did-o-jalwa karun kyun nazar ko main

nazron mein khinch lata hun jab jalwa-gar ko main

dekhun to jurm aur na dekhun to kufr hai

ab kya kahun jamal-e-ruKH-e-fitna-gar ko main

aisa nahin ki dil mein mere zaKHm hi na ho

aankhon mein rok leta hun KHun-e-jigar ko main

daman-e-sabr chhuTne lagta hai hath se

jab dekhta hun duri-e-sham-o-sahar ko main

manzil pe aa ke aaj ye samjha ki aaj tak

manzil samajh raha tha faqat rahguzar ko main

manzil ki justuju mein na jaane kahan kahan

sar par liye phira hun ghubar-e-safar ko main

ek qasr-e-arzu tha gira TuT TuT kar

hasrat se dekhta raha diwar-o-dar ko main

milne ko 'nur' yun to bahut gham yahan mile

tarsa tamam umr gham-e-mo'tabar ko main