mujh aise shaKHs ki hajat-rawai karte hue

mujh aise shaḳhs kī hājat-ravā.ī karte hue

bhaTak gayā thā vo kār-e-ḳhudā.ī karte hue

ki bātoñ bātoñ meñ manzil se duur le gayā thā

vo nā-ḳhudā-e-suḳhan rahnumā.ī karte hue

abhī hai vaise kā vaisā hī haal andar kā

ki umr Dhal ga.ī dil kī safā.ī karte hue

nisāb-e-ishq abhī tak hai māvarā-e-ḳhirad

ki tiis saal hue haiñ paḌhā.ī karte hue

halāl luqma khilānā hai apne bachchoñ ko

hamesha soch ye rakkhī kamā.ī karte hue

vo khel baiThā mohabbat se phir mohabbat ne

javābī vaar kiyā kāravā.ī karte hue

na koī dukh kā ta.assur na thī pashemānī

malāl tak na huā bevafā.ī karte hue

diyā palaT ke sahārā sisaktī beTī ne

ki baap girne lagā thā vidā.ī karte hue

taḌap ke rakh diye āñkhoñ pe merī haath us ne

maiñ zaḳhm dekh rahā thā silā.ī karte hue

jo mo'atabar gine jaate the vo bhī paa.e ga.e

ġhalat jagah pe ġhalat ham-navā.ī karte hue

ḳhulūs raas na aayā 'umar' ki jo bhī milā

daġhā hī detā gayā bhaa.ī bhaa.ī karte hue

mujh aise shaKHs ki hajat-rawai karte hue

bhaTak gaya tha wo kar-e-KHudai karte hue

ki baaton baaton mein manzil se dur le gaya tha

wo na-KHuda-e-suKHan rahnumai karte hue

abhi hai waise ka waisa hi haal andar ka

ki umr Dhal gai dil ki safai karte hue

nisab-e-ishq abhi tak hai mawara-e-KHirad

ki tis sal hue hain paDhai karte hue

halal luqma khilana hai apne bachchon ko

hamesha soch ye rakkhi kamai karte hue

wo khel baiTha mohabbat se phir mohabbat ne

jawabi war kiya karawai karte hue

na koi dukh ka tassur na thi pashemani

malal tak na hua bewafai karte hue

diya palaT ke sahaara sisakti beTi ne

ki bap girne laga tha widai karte hue

taDap ke rakh diye aankhon pe meri hath us ne

main zaKHm dekh raha tha silai karte hue

jo mo'atabar gine jate the wo bhi pae gae

ghalat jagah pe ghalat ham-nawai karte hue

KHulus ras na aaya 'umar' ki jo bhi mila

dagha hi deta gaya bhai bhai karte hue