mujh darwesh ko matlab kya hai mansab se jagiron se

mujh darvesh ko matlab kyā hai mansab se jāgīroñ se

jis ne shab-bhar ḳhvāb bune hoñ vo uljhe tā'bīroñ se

ghar-ghar ḳhushbū baañT rahā huuñ ek dukāñ hai phūloñ kī

kuchh rangoñ se rabt hai merā kuchh raġhbat tasvīroñ se

aksar auñdhe muñh girte haiñ havā kī rau meñ bahte log

aksar khel bigaḌ jaate haiñ be-mauqa’ tadbīroñ se

kaisā rog lagā hai dil ko jaane kyā bīmārī hai

chāragaroñ se baat banī hai pīroñ se na faqīroñ se

bas ye soch ke ḳhāmoshī hai būḌhe baap ke hoñToñ par

bachche bāġhī ho jaate haiñ aksar ab taqrīroñ se

harf-harf se rang uḌeñ aur lafz-lafz meñ ḳhushbū ho

aisā ho koī likhne vaalā phuul khileñ tahrīroñ se

kis ne niiñd uḌā rakkhī hai 'ādil' pahre-dāroñ kī

kaun ye pāgal khel rahā hai zindāñ meñ zanjīroñ se

mujh darwesh ko matlab kya hai mansab se jagiron se

jis ne shab-bhar KHwab bune hon wo uljhe ta'biron se

ghar-ghar KHushbu banT raha hun ek dukan hai phulon ki

kuchh rangon se rabt hai mera kuchh raghbat taswiron se

aksar aundhe munh girte hain hawa ki rau mein bahte log

aksar khel bigaD jate hain be-mauqa’ tadbiron se

kaisa rog laga hai dil ko jaane kya bimari hai

chaaragaron se baat bani hai piron se na faqiron se

bas ye soch ke KHamoshi hai buDhe bap ke honTon par

bachche baghi ho jate hain aksar ab taqriron se

harf-harf se rang uDen aur lafz-lafz mein KHushbu ho

aisa ho koi likhne wala phul khilen tahriron se

kis ne nind uDa rakkhi hai 'adil' pahre-daron ki

kaun ye pagal khel raha hai zindan mein zanjiron se