mujh diye par ye ek ata rahi hai

mujh diye par ye ik atā rahī hai

ḳhud muhāfiz mirī havā rahī hai

log sahme hue haiñ hijrat se

dhuul chehroñ pe muskurā rahī hai

tere īmān kā ḳhudā-hāfiz

tū use naam se bulā rahī hai

shor har gaam kāmyāb rahā

ḳhāmushī ġham meñ mubtalā rahī hai

vaqt par kaar ban gayā so yahāñ

bebasī dā.ere banā rahī hai

is ta.alluq pe maut vājib thī

dostī darmiyān aa rahī hai

tere mutalāshiyoñ kī ḳhair jinheñ

tīrgī rāste batā rahī hai

is kā radd-e-amal bhī dhyān meñ rakh

tū agar mas.ala uThā rahī hai

ham ġharīboñ kī umr bhar 'faisal'

pahlī tarjīh bas anā rahī hai

mujh diye par ye ek ata rahi hai

KHud muhafiz meri hawa rahi hai

log sahme hue hain hijrat se

dhul chehron pe muskura rahi hai

tere iman ka KHuda-hafiz

tu use nam se bula rahi hai

shor har gam kaamyab raha

KHamushi gham mein mubtala rahi hai

waqt par kar ban gaya so yahan

bebasi daere bana rahi hai

is talluq pe maut wajib thi

dosti darmiyan aa rahi hai

tere mutalashiyon ki KHair jinhen

tirgi raste bata rahi hai

is ka radd-e-amal bhi dhyan mein rakh

tu agar masala uTha rahi hai

hum gharibon ki umr bhar 'faisal'

pahli tarjih bas ana rahi hai