mujhko ab ishq ke idrak se Dar lagta hai

mujh ko ab 'ishq ke idrāk se Dar lagtā hai

ab to har jazba-e-bebāk se Dar lagtā hai

gardish-e-vaqt ne vo zaḳhm diye haiñ ki mujhe

raqs karte hue har chaak se Dar lagtā hai

kyā ḳhabar kaun se safhe kā likhā le Duube

is liye daftar-e-aflāk se Dar lagtā hai

narm lafzoñ se banā tanz bharā pahnāvā

aadmī kī isī poshāk se Dar lagtā hai

jis kī taḳhlīq huī ḳhaak se hairat ye hai

maut ke Dar se use ḳhaak se Dar lagtā hai

fasl kāñToñ kī ugī aisī chaman meñ is baar

sehn-e-gul ke ḳhas-o-ḳhāshāk se Dar lagtā hai

us kī qurbat kā fusūñ soch badaltā hai mirī

dil kī is hālat-e-bebāk se Dar lagtā hai

yaad hai vaqt-e-judā.ī vo namī āñkhoñ kī

ab to har dīda-e-namnāk se Dar lagtā hai

hijr meñ dil mirā ruk ruk ke chalā kartā hai

dil kī is hālat-e-ġhamnāk se Dar lagtā hai

aadmī ko kare arzāñ ho jo fitne kā sabab

aise har jazba-e-saffāk se Dar lagtā hai

mujh ko ab 'ishq ke idrak se Dar lagta hai

ab to har jazba-e-bebak se Dar lagta hai

gardish-e-waqt ne wo zaKHm diye hain ki mujhe

raqs karte hue har chaak se Dar lagta hai

kya KHabar kaun se safhe ka likha le Dube

is liye daftar-e-aflak se Dar lagta hai

narm lafzon se bana tanz bhara pahnawa

aadmi ki isi poshak se Dar lagta hai

jis ki taKHliq hui KHak se hairat ye hai

maut ke Dar se use KHak se Dar lagta hai

fasl kanTon ki ugi aisi chaman mein is bar

sehn-e-gul ke KHas-o-KHashak se Dar lagta hai

us ki qurbat ka fusun soch badalta hai meri

dil ki is haalat-e-bebak se Dar lagta hai

yaad hai waqt-e-judai wo nami aankhon ki

ab to har dida-e-namnak se Dar lagta hai

hijr mein dil mera ruk ruk ke chala karta hai

dil ki is haalat-e-ghamnak se Dar lagta hai

aadmi ko kare arzan ho jo fitne ka sabab

aise har jazba-e-saffak se Dar lagta hai