mujhko auron se koi shikwa nahin

mujh ko auroñ se koī shikva nahīñ

maiñ ne bhī to ḳhud ko pahchānā nahīñ

sar pe aa pahuñchā hai sūraj karb kā

saath apne saaya bhī apnā nahīñ

shauq-e-manzil hī hai merā ḳhizr-e-rāh

naqsh-e-pā har moḌ par miltā nahīñ

ho gayā ḳhūn-e-hayāt ab yuuñ safed

jaise merā us se kuchh rishta nahīñ

hai ḳhayāl-e-ḳhām vo maiñ ne jise

pairahan alfāz kā baḳhshā nahīñ

ab hai chehroñ par naqāb-e-maslahat

koī chehra dil kā ā.īna nahīñ

kyoñ na ho sho.ala-ba-dāman zindagī

kis taraf ab aag kā dariyā nahīñ

phuul kī ik pankhuḌī kahiye use

zindagī ik barg-e-āvāra nahīñ

zehn-e-'shiblī' meñ hai us kī guuñj bhī

vaqt ke hoñToñ pe jo naġhma nahīñ

mujh ko auron se koi shikwa nahin

main ne bhi to KHud ko pahchana nahin

sar pe aa pahuncha hai suraj karb ka

sath apne saya bhi apna nahin

shauq-e-manzil hi hai mera KHizr-e-rah

naqsh-e-pa har moD par milta nahin

ho gaya KHun-e-hayat ab yun safed

jaise mera us se kuchh rishta nahin

hai KHayal-e-KHam wo main ne jise

pairahan alfaz ka baKHsha nahin

ab hai chehron par naqab-e-maslahat

koi chehra dil ka aaina nahin

kyon na ho shoala-ba-daman zindagi

kis taraf ab aag ka dariya nahin

phul ki ek pankhuDi kahiye use

zindagi ek barg-e-awara nahin

zehn-e-'shibli' mein hai us ki gunj bhi

waqt ke honTon pe jo naghma nahin