mujhko be-KHwabi ki Tahni par sisakte dekhta rahta hai wo

mujh ko be-ḳhvābī kī Tahnī par sisakte dekhtā rahtā hai vo

apnī hī be-dardiyoñ ko yuuñ mahakte dekhtā rahtā hai vo

sūrat-e-mahtāb rahtā hai mire sar par safar ke saath saath

mujh ko sahrā kī udāsī meñ bhaTakte rahtā hai vo

peḌ kī sūrat khaḌā rahtā hai merī mauj kī sarhad ke paas

mere sar par dhuup ke neze chamakte dekhtā rahtā hai vo

raat thak kar aan girtā hai mire jalte badan kī aañch par

apne aañsū mere gāloñ par Dhalakte dekhtā rahtā hai vo

maiñ vo bosīda sā pairāhan huuñ jo pahnā gayā thā ek baar

mujh ko mahrūmī kī khūñTī par laTakte dekhtā rahtā hai vo

merī hī majbūriyoñ ke zikr se 'nāsik' rulātā hai mujhe

sāmne apne na.e jugnū damakte dekhtā rahtā hai vo

mujh ko be-KHwabi ki Tahni par sisakte dekhta rahta hai wo

apni hi be-dardiyon ko yun mahakte dekhta rahta hai wo

surat-e-mahtab rahta hai mere sar par safar ke sath sath

mujh ko sahra ki udasi mein bhaTakte rahta hai wo

peD ki surat khaDa rahta hai meri mauj ki sarhad ke pas

mere sar par dhup ke neze chamakte dekhta rahta hai wo

raat thak kar aan girta hai mere jalte badan ki aanch par

apne aansu mere galon par Dhalakte dekhta rahta hai wo

main wo bosida sa pairahan hun jo pahna gaya tha ek bar

mujh ko mahrumi ki khunTi par laTakte dekhta rahta hai wo

meri hi majburiyon ke zikr se 'nasik' rulata hai mujhe

samne apne nae jugnu damakte dekhta rahta hai wo