mujhko be-rahm tabibon se bachaya jae

mujh ko be-rahm tabīboñ se bachāyā jaa.e

ab duā māñgne vāloñ ko bulāyā jaa.e

sirf mahsūs kareñ log magar sun na sakeñ

shor kuchh itnī ḳhamoshī se machāyā jaa.e

ḳhaas logoñ pe jahāñ aane kī ho pābandī

mujh ko us aam sī mahfil meñ bulāyā jaa.e

dard kā bojh uThāte hue ik umr huī

kuchh ḳhushī kā bhī to ehsān uThāyā jaa.e

yuuñ to har baat pe rone kī hai aadat us ko

dil ba-zid hai ke use aaj hañsāyā jaa.e

hai jafākār vo jaa.e to use jaane do

kyoñ bhalā zaḳhm ko nāsūr banāyā jaa.e

'ā.isha' ḳhud se hī maiñ laḌtī rahūñgī kab tak

ab mujhe mere muqābil se haTāyā jaa.e

mujh ko be-rahm tabibon se bachaya jae

ab dua mangne walon ko bulaya jae

sirf mahsus karen log magar sun na saken

shor kuchh itni KHamoshi se machaya jae

KHas logon pe jahan aane ki ho pabandi

mujh ko us aam si mahfil mein bulaya jae

dard ka bojh uThate hue ek umr hui

kuchh KHushi ka bhi to ehsan uThaya jae

yun to har baat pe rone ki hai aadat us ko

dil ba-zid hai ke use aaj hansaya jae

hai jafakar wo jae to use jaane do

kyon bhala zaKHm ko nasur banaya jae

'aisha' KHud se hi main laDti rahungi kab tak

ab mujhe mere muqabil se haTaya jae