mujhko dil qismat ne usko husn-e-ghaarat-gar diya

mujh ko dil qismat ne us ko husn-e-ġhārat-gar diyā

chuur kar de kyuuñ na vo shīsha jise patthar diyā

us se tālib huuñ diyat kā aap se matlab nahīñ

jis ne gardan ek ko dī ek ko ḳhanjar diyā

thā mukāfāt-e-amal ahbāb kā husn-e-amal

ye bhī aisā qarz thā jo aur se le kar diyā

ab na hai fikr-e-hifāzat aur na zīq-e-raf-e-kār

dene vaale ne diyā aur merī ḳhvāhish bhar diyā

girya-e-be-iḳhtiyār-e-ġham bhī thā fitrī ilaaj

jis ne thoḌe josh ko har martaba kam kar diyā

jis meñ kaif-e-ġham nahīñ baaz aa.e aise dil se ham

ye bhī duniyā hai koī mai to na dī sāġhar diyā

'ārzū' ik roz Dhā detā mujhe merā hī zor

ye bhī us kī kārsāzī dil meñ jis ne Dar diyā

mujh ko dil qismat ne us ko husn-e-ghaarat-gar diya

chur kar de kyun na wo shisha jise patthar diya

us se talib hun diyat ka aap se matlab nahin

jis ne gardan ek ko di ek ko KHanjar diya

tha mukafat-e-amal ahbab ka husn-e-amal

ye bhi aisa qarz tha jo aur se le kar diya

ab na hai fikr-e-hifazat aur na ziq-e-raf-e-kar

dene wale ne diya aur meri KHwahish bhar diya

girya-e-be-iKHtiyar-e-gham bhi tha fitri ilaj

jis ne thoDe josh ko har martaba kam kar diya

jis mein kaif-e-gham nahin baz aae aise dil se hum

ye bhi duniya hai koi mai to na di saghar diya

'arzu' ek roz Dha deta mujhe mera hi zor

ye bhi us ki karsazi dil mein jis ne Dar diya