mujhko dimagh-e-garmi-e-bazar hai kahan

mujh ko dimāġh-e-garmī-e-bāzār hai kahāñ

afsurdagī meñ lazzat-e-guftār hai kahāñ

yārān-e-maslahat meñ nahīñ jauhar-e-vafā

ahl-e-ġharaz meñ ḳhūbī-e-kirdār hai kahāñ

lākhoñ kī bhiiḌ meñ bhī huuñ sab se alag-thalag

is shahr meñ ġharīb kā ġham-ḳhvār hai kahāñ

jalvoñ ko bhī hai chashm-e-tamāshā kī justujū

vo pūchhte haiñ tālib-e-dīdār hai kahāñ

kāñToñ meñ aa ga.ī hai gul-e-tar kī tāzgī

ab lutf-e-sair-e-vādī-e-pur-ḳhār hai kahāñ

nākāmiyoñ kī dhuup meñ jalte haiñ dil-jale

sahrā-e-ġham meñ sāya-e-dīvār hai kahāñ

shauq-e-husūl-zar hai to zauq-e-suḳhan na rakh

nūr-e-sahar kahāñ hai shab-e-tār hai kahāñ

dillī kī bhīḌ-bhāḌ meñ gum ho gayā hai dil

tanhā bhaTak rahā huuñ dil-e-zār hai kahāñ

'tālib' ġham-e-hayāt ne jiinā sikhā diyā

ab zindagī kā baar mujhe baar hai kahāñ

mujh ko dimagh-e-garmi-e-bazar hai kahan

afsurdagi mein lazzat-e-guftar hai kahan

yaran-e-maslahat mein nahin jauhar-e-wafa

ahl-e-gharaz mein KHubi-e-kirdar hai kahan

lakhon ki bhiD mein bhi hun sab se alag-thalag

is shahr mein gharib ka gham-KHwar hai kahan

jalwon ko bhi hai chashm-e-tamasha ki justuju

wo puchhte hain talib-e-didar hai kahan

kanTon mein aa gai hai gul-e-tar ki tazgi

ab lutf-e-sair-e-wadi-e-pur-KHar hai kahan

nakaamiyon ki dhup mein jalte hain dil-jale

sahra-e-gham mein saya-e-diwar hai kahan

shauq-e-husul-zar hai to zauq-e-suKHan na rakh

nur-e-sahar kahan hai shab-e-tar hai kahan

dilli ki bhiD-bhaD mein gum ho gaya hai dil

tanha bhaTak raha hun dil-e-zar hai kahan

'talib' gham-e-hayat ne jina sikha diya

ab zindagi ka bar mujhe bar hai kahan