مجھ کو دماغ شیون و آہ و فغاں نہیں

مجھ کو دماغ شیون و آہ و فغاں نہیں

اک آتش خموش ہوں جس میں دھواں نہیں

کس سادگی سے کہتے ہو ہم رازداں نہیں

وہ کون سا ہے راز جو تم پر عیاں نہیں

وہ دشمن سکون دل و جاں یہی نہ ہو

معصوم سی نگاہ کہ جس پر گماں نہیں

ہے آگ سی لگی ہوئی رگ رگ میں کیا کہوں

اک چشم انتظار ہی یاں خونچکاں نہیں

یوں دیکھتا ہوں برق کو اللہ رے بے دلی

جیسے کہیں چمن میں مرا آشیاں نہیں

اس چشم ناز کی کوئی دیکھے فسوں گری

بار حیات بھی مجھے اب تو گراں نہیں

اے مست ناز مشق ستم اس سے بھی سوا

اے ذوق درد حیف اگر جاوداں نہیں

اے دل سر نیاز کو کیا قید سنگ و در

کعبہ ہی کیا برا ہے جو وہ آستاں نہیں

کی فرصت حیات تری جستجو میں صرف

اے وائے گر ہنوز وفا کا گماں نہیں