mujhko duniya ki tamanna hai na din ka lalach

mujh ko duniyā kī tamannā hai na diiñ kā lālach

haa.e lālach hai to ik māh-jabīñ kā lālach

ishq-bāzī pe sunā mujh ko malāmat na karo

haif hai jis ko na ho tum se hasīñ kā lālach

hālat-e-qalb sar-e-bazm batā.ūñ kyūñkar

parda-e-dil meñ hai ik parda-nashīñ kā lālach

jab yahīñ taish meñ guzre to vahāñ kyā ummīd

na rahā is liye ham ko to kahīñ kā lālach

boriyā taḳht-e-sulaimāñ se kahīñ behtar hai

ham ġharīboñ ko nahīñ tāj-o-nagīñ kā lālach

na maiñ duniyā kā talabgār na uqbā kī havas

āsmānoñ kī tamannā na zamīñ kā lālach

dil bhī do jaan bhī do zar bhī do us ko 'parvīñ'

baḌh gayā sab se mire māh-jabīñ kā lālach

mujh ko duniya ki tamanna hai na din ka lalach

hae lalach hai to ek mah-jabin ka lalach

ishq-bazi pe suna mujh ko malamat na karo

haif hai jis ko na ho tum se hasin ka lalach

haalat-e-qalb sar-e-bazm bataun kyunkar

parda-e-dil mein hai ek parda-nashin ka lalach

jab yahin taish mein guzre to wahan kya ummid

na raha is liye hum ko to kahin ka lalach

boriya taKHt-e-sulaiman se kahin behtar hai

hum gharibon ko nahin taj-o-nagin ka lalach

na main duniya ka talabgar na uqba ki hawas

aasmanon ki tamanna na zamin ka lalach

dil bhi do jaan bhi do zar bhi do us ko 'parwin'

baDh gaya sab se mere mah-jabin ka lalach