مجھ کو جانا ہے ذرا ہم سفروں سے آگے

مجھ کو جانا ہے ذرا ہم سفروں سے آگے

ان کی آنکھوں سے پرے اپنے پروں سے آگے

ہم جو یہ جان بچانے کا ہنر جانتے ہیں

کچھ رہ و رسم تھی بیداد گروں سے آگے

تم کو اے خیرہ سرو ہم پہ فضیلت کیا ہے

بس وہی طرۂ دستار سروں سے آگے

وہیں رہ جاتے ہیں سب حد سے گزرنے والے

چلتی رہتی ہے زمیں بے خبروں سے آگے

عمر بھر بصرہ و بغداد بساتے رہے لوگ

اور دیکھا تو وہی دشت گھروں سے آگے

درد کے فیض سے دل عیش دو عالم سے غنی

عشق کے راج میں ہم تاجوروں سے آگے