mujhko jab ghaur se takte hain zamane wale

mujh ko jab ġhaur se takte haiñ zamāne vaale

hū-bahū lagte haiñ tasvīr banāne vaale

vaqt rakh degā tirī piiTh pe ye shab kā pahāḌ

bojh chup-chāp añdhere kā uThāne vaale

yaad rakkhūñgā tujhe ek haqīqat kī tarah

ek qisse kī tarah mujh ko bhulāne vaale

raat kī oT liye rote haiñ tanhā tanhā

din ke jalvoñ meñ hazāroñ ko hañsāne vaale

chhuptī phirtī hai yūñhī raah dhuñdalkoñ meñ kyoñ

ham nahīñ biich meñ yuuñ lauT ke jaane vaale

vo koī aur haiñ jo dete haiñ shab kā paiġhām

ham to haiñ sub.h kā elaan sunāne vaale

mudda.ā terā kuchh auroñ se judā lagtā hai

dāstāñ ek hī har baar sunāne vaale

yaañ se utreñge to ham hoñge sahar ke rath meñ

ham ko ai raat kī suulī pe chaḌhāne vaale

ham ne sadiyoñ kā safar lamhoñ meñ kaaTā 'ābid'

jaane kis moḌ pe aTke haiñ zamāne vaale

mujh ko jab ghaur se takte hain zamane wale

hu-bahu lagte hain taswir banane wale

waqt rakh dega teri piTh pe ye shab ka pahaD

bojh chup-chap andhere ka uThane wale

yaad rakkhunga tujhe ek haqiqat ki tarah

ek qisse ki tarah mujh ko bhulane wale

raat ki oT liye rote hain tanha tanha

din ke jalwon mein hazaron ko hansane wale

chhupti phirti hai yunhi rah dhundalkon mein kyon

hum nahin bich mein yun lauT ke jaane wale

wo koi aur hain jo dete hain shab ka paigham

hum to hain subh ka elan sunane wale

muddaa tera kuchh auron se juda lagta hai

dastan ek hi har bar sunane wale

yan se utrenge to hum honge sahar ke rath mein

hum ko ai raat ki suli pe chaDhane wale

hum ne sadiyon ka safar lamhon mein kaTa 'abid'

jaane kis moD pe aTke hain zamane wale