mujhko malum na tha un se mohabbat hogi

mujh ko ma.alūm na thā un se mohabbat hogī

dard par dard musībat pe musībat hogī

yahī hālat hai to ik roz ye sūrat hogī

qais-o-farhād se baḌh kar mirī vahshat hogī

kar ke badnām mujhe aur ye kahnā us par

aap ke milne se be-shak mirī zillat hogī

iztirāb-e-dil-e-muztar hai bayāñ se bāhar

tere dīdār se hāsil ise rāhat hogī

le ḳhabar jald masīhā tū ḳhudārā aa kar

tere bīmār kī varna burī hālat hogī

dil ye kahtā hai zarā chal tū dar-e-jānāñ tak

sharm kahtī hai tire jaane meñ zillat hogī

maiñ ne pūchhā ki bhalā phir bhī miloge sāhib

bole muñh pher ke haañ gar hameñ fursat hogī

aap chal phir ke zarā chaal dikhā.eñ to sahī

aap kī jaane balā hogī qayāmat hogī

maiñ to ghul ghul ke yūñhī hijr meñ jaañ dūñgā 'azīz'

us ko ma.alūm mire baad haqīqat hogī

mujh ko malum na tha un se mohabbat hogi

dard par dard musibat pe musibat hogi

yahi haalat hai to ek roz ye surat hogi

qais-o-farhad se baDh kar meri wahshat hogi

kar ke badnam mujhe aur ye kahna us par

aap ke milne se be-shak meri zillat hogi

iztirab-e-dil-e-muztar hai bayan se bahar

tere didar se hasil ise rahat hogi

le KHabar jald masiha tu KHudara aa kar

tere bimar ki warna buri haalat hogi

dil ye kahta hai zara chal tu dar-e-jaanan tak

sharm kahti hai tere jaane mein zillat hogi

main ne puchha ki bhala phir bhi miloge sahib

bole munh pher ke han gar hamein fursat hogi

aap chal phir ke zara chaal dikhaen to sahi

aap ki jaane bala hogi qayamat hogi

main to ghul ghul ke yunhi hijr mein jaan dunga 'aziz'

us ko malum mere baad haqiqat hogi