mujhko mat chhuna ki ris kar phuTne wala hun main

mujh ko mat chhūnā ki ris kar phūTne vaalā huuñ maiñ

tujh ko kyā ma.alūm tere tanz kā chhālā huuñ maiñ

aaj zehnoñ meñ huuñ lekin kal kā andesha huuñ maiñ

darmiyāñ donoñ ke gir kar TūTtā rishta huuñ maiñ

āḌī-tirchhī sī lakīreñ khīñchtā huuñ aur phir

us ko har manzar meñ rakh kar rañg bhar detā huuñ maiñ

vo to yuuñ ḳhush hai samajhtā hai ki maiñ tairāk huuñ

us ko kyā ma.alūm ḳhud hī Dūbne vaalā huuñ maiñ

apnī gul-poshī pe maiñ nādim bhī huuñ sarshār bhī

haar kar jiitā huuñ jaane jiit kar haarā huuñ maiñ

mujh ko mat chhuna ki ris kar phuTne wala hun main

tujh ko kya malum tere tanz ka chhaala hun main

aaj zehnon mein hun lekin kal ka andesha hun main

darmiyan donon ke gir kar TuTta rishta hun main

aaDi-tirchhi si lakiren khinchta hun aur phir

us ko har manzar mein rakh kar rang bhar deta hun main

wo to yun KHush hai samajhta hai ki main tairak hun

us ko kya malum KHud hi Dubne wala hun main

apni gul-poshi pe main nadim bhi hun sarshaar bhi

haar kar jita hun jaane jit kar haara hun main