mujhko na tha malum to hai is mein ajab kya

mujh ko na thā mālūm to hai is meñ ajab kyā

ye kaun batā saktā hai ho jā.egā kab kyā

is kā to maza tab hai ki jab dā.imī ho jaa.e

kuchh din ke liye haiñ bhī to haiñ aish-o-tarab kyā

saaya hai kahīñ nuur mirā zauq farāvāñ

sūraj kī tapish kyā hai ye tārīki-e-shab kyā

ḳhud uTh ke chalī aatī hai manzil mirī jānib

aise meñ ho mujh ko kisī manzil kī talab kyā

is nasl ko ham ne hī to bebāk banāyā

ho apne buzurgoñ kā inheñ pās-o-adab kyā

jo roz na.ī tarz-e-sitam karte haiñ ījād

ḳhud ḳhuuñ meñ vo ik roz nahā.eñ to ajab kyā

allāh pe 'fārūq' tavakkul to kare tū

phir dekh tire haq meñ karegā tirā rab kyā

mujh ko na tha malum to hai is mein ajab kya

ye kaun bata sakta hai ho jaega kab kya

is ka to maza tab hai ki jab daimi ho jae

kuchh din ke liye hain bhi to hain aish-o-tarab kya

saya hai kahin nur mera zauq farawan

suraj ki tapish kya hai ye tariki-e-shab kya

KHud uTh ke chali aati hai manzil meri jaanib

aise mein ho mujh ko kisi manzil ki talab kya

is nasl ko hum ne hi to bebak banaya

ho apne buzurgon ka inhen pas-o-adab kya

jo roz nai tarz-e-sitam karte hain ijad

KHud KHun mein wo ek roz nahaen to ajab kya

allah pe 'faruq' tawakkul to kare tu

phir dekh tere haq mein karega tera rab kya