mujhko na-karda gunah ka motarif hona paDa

mujh ko nā-karda gunah kā mo'tarif honā paḌā

rasm aisī thī ki ḳhud se munharif honā paḌā

koī bhī mujh sā na thā bebāk bazm-e-shauq meñ

is tarah mujh ko sabhoñ se muḳhtalif honā paḌā

ek hī shai thī ki jis par bach rahā thā e'timād

pas mujhe apnī anā se muttasif honā paḌā

vo yaqīnan rāz-andar-rāz thā lekin use

ek din mujh nā-tavāñ par munkashif honā paḌā

kyā batā.ūñ ma.abad-e-tanhā.ī meñ mujh riñd ko

umr-bhar ke vāste kyuuñ mo.atakif honā paḌā

mujh ko na-karda gunah ka mo'tarif hona paDa

rasm aisi thi ki KHud se munharif hona paDa

koi bhi mujh sa na tha bebak bazm-e-shauq mein

is tarah mujh ko sabhon se muKHtalif hona paDa

ek hi shai thi ki jis par bach raha tha e'timad

pas mujhe apni ana se muttasif hona paDa

wo yaqinan raaz-andar-raaz tha lekin use

ek din mujh na-tawan par munkashif hona paDa

kya bataun mabad-e-tanhai mein mujh rind ko

umr-bhar ke waste kyun moatakif hona paDa