mujhko qismat se mil gaya tha wo

mujh ko qismat se mil gayā thā vo

uf muqaddar meñ kab likhā thā vo

maiñ ga.ī hāl-e-dil sunāne ko

aur rush meñ ghirā huā thā vo

jis ko tarsī rahīñ mirī āñkheñ

sāmne hī khaḌā huā thā vo

jis kī ḳhātir sañvar ke aa.ī maiñ

ik nazar bhī na dekhtā thā vo

us ke chehre ko paḌh rahī thī maiñ

ek kāġhaz pe likh rahā thā vo

dil kī dhaḌkan bhī tez ho ga.ī thī

aise ruk ruk ke boltā thā vo

is kā lahja ki guḌ se mīThā thā

chāshnī aise gholtā thā vo

maiñ ne phūloñ se bhar liyā āñchal

ki achānak hī hañs diyā thā vo

maiñ bhī chup thī ki us se kahtī kyā

aur āñkhoñ ko paḌh rahā thā vo

maiñ ne chaa.e jo pesh kī thī use

ik takalluf meñ paḌ gayā thā vo

ek chaa.e kyā jaan detī maiñ

shukriya aise kah rahā thā vo

vo jo barsoñ se rok rakkhā thā

mere hoñToñ pe aa gayā thā vo

phir mere lafz hī nahīñ bole

aur chup-chāp sun rahā thā vo

ek zid par aḌī huī thī maiñ

ik anā meñ paḌā huā thā vo

mere aañsū bhī dekh na paayā

ḳhush raheñ aap kah rahā thā vo

maiñ ne sochā ki kuchh to pūchhegā

jā rahī thī maiñ chup khaḌā thā vo

us ko hairat se dekhtī thī maiñ

mujh ko hairat se dekhtā thā vo

āḳhirī nazm likh kar aa ga.ī maiñ

phir mirī nazm paḌh rahā thā vo

mere sajde bhī ho ga.e the qazā

yaad sajdoñ meñ aa gayā thā vo

maiñ ne bāñdhī namāz-e-ishq 'kañval'

mere pahlū meñ jab khaḌā thā vo

mujh ko qismat se mil gaya tha wo

uf muqaddar mein kab likha tha wo

main gai haal-e-dil sunane ko

aur rush mein ghira hua tha wo

jis ko tarsi rahin meri aankhen

samne hi khaDa hua tha wo

jis ki KHatir sanwar ke aai main

ek nazar bhi na dekhta tha wo

us ke chehre ko paDh rahi thi main

ek kaghaz pe likh raha tha wo

dil ki dhaDkan bhi tez ho gai thi

aise ruk ruk ke bolta tha wo

is ka lahja ki guD se miTha tha

chashni aise gholta tha wo

main ne phulon se bhar liya aanchal

ki achanak hi hans diya tha wo

main bhi chup thi ki us se kahti kya

aur aankhon ko paDh raha tha wo

main ne chae jo pesh ki thi use

ek takalluf mein paD gaya tha wo

ek chae kya jaan deti main

shukriya aise kah raha tha wo

wo jo barson se rok rakkha tha

mere honTon pe aa gaya tha wo

phir mere lafz hi nahin bole

aur chup-chap sun raha tha wo

ek zid par aDi hui thi main

ek ana mein paDa hua tha wo

mere aansu bhi dekh na paya

KHush rahen aap kah raha tha wo

main ne socha ki kuchh to puchhega

ja rahi thi main chup khaDa tha wo

us ko hairat se dekhti thi main

mujh ko hairat se dekhta tha wo

aaKHiri nazm likh kar aa gai main

phir meri nazm paDh raha tha wo

mere sajde bhi ho gae the qaza

yaad sajdon mein aa gaya tha wo

main ne bandhi namaz-e-ishq 'kanwal'

mere pahlu mein jab khaDa tha wo