mujhko tere KHayal se wahshat kabhi na thi

mujh ko tire ḳhayāl se vahshat kabhī na thī

is darja be-adab ye tabī.at kabhī na thī

had hai usī ke paas hai kirdār kī sanad

jis kī tamām shahr meñ izzat kabhī na thī

yaaro duā karo ye koī hādsa na ho

pahle yuuñ intizār meñ lazzat kabhī na thī

yā to jafā.eñ aap kī had se guzar ga.iiñ

yā phir hameñ sazāoñ kī aadat kabhī na thī

'jāzib' ġham-e-hayāt kī talḳhī zabāñ pe hai

varna hameñ jahāñ se shikāyat kabhī na thī

mujh ko tere KHayal se wahshat kabhi na thi

is darja be-adab ye tabiat kabhi na thi

had hai usi ke pas hai kirdar ki sanad

jis ki tamam shahr mein izzat kabhi na thi

yaro dua karo ye koi hadsa na ho

pahle yun intizar mein lazzat kabhi na thi

ya to jafaen aap ki had se guzar gain

ya phir hamein sazaon ki aadat kabhi na thi

'jazib' gham-e-hayat ki talKHi zaban pe hai

warna hamein jahan se shikayat kabhi na thi