mujhko ye chheD ki tum se bhi hasin hote hain

mujh ko ye chheḌ ki tum se bhī hasīñ hote haiñ

un ko ye zid ki dikhā do jo kahīñ hote haiñ

un ko ham se hai ta.alluq na hameñ un se ġharaz

ab yahīñ hote haiñ shikve na vahīñ hote haiñ

un se bach jaa.e jo īmāñ to ġhanīmat samjho

ḳhush nigāhoñ meñ bahut rahzan-e-dīñ hote haiñ

laakh vo naaz se Thukrā.eñ adū kī turbat

ye ajab baat hai pāmāl hamīñ hote haiñ

ab tasavvur meñ bhī tasdīq kā aatā hai maza

jab gumāñ miTte haiñ vallāh yaqīñ hote haiñ

bāteñ pyārī haiñ hasīnoñ kī adā.eñ pyārī

aib ye hai ki vafādār nahīñ hote haiñ

apne maiḳhāne ko jannat kā batāte haiñ javāb

itne behosh ḳharābāt-nashīñ hote haiñ

ik faqat naam kā honā hai jahāñ meñ un kā

na makāñ hote haiñ 'safdar' na makīñ hote haiñ

mujh ko ye chheD ki tum se bhi hasin hote hain

un ko ye zid ki dikha do jo kahin hote hain

un ko hum se hai talluq na hamein un se gharaz

ab yahin hote hain shikwe na wahin hote hain

un se bach jae jo iman to ghanimat samjho

KHush nigahon mein bahut rahzan-e-din hote hain

lakh wo naz se Thukraen adu ki turbat

ye ajab baat hai pamal hamin hote hain

ab tasawwur mein bhi tasdiq ka aata hai maza

jab guman miTte hain wallah yaqin hote hain

baaten pyari hain hasinon ki adaen pyari

aib ye hai ki wafadar nahin hote hain

apne maiKHane ko jannat ka batate hain jawab

itne behosh KHarabaat-nashin hote hain

ek faqat nam ka hona hai jahan mein un ka

na makan hote hain 'safdar' na makin hote hain