mujh mein har tufan hai aks-e-nazar mein kuchh nahin

mujh meñ har tūfān hai aks-e-nazar meñ kuchh nahīñ

dil kī sozish dekhiye to chashm-e-tar meñ kuchh nahīñ

raat kā saarā samundar paar kar aa.ī magar

āgahī ke paas tā.īd-e-sahar meñ kuchh nahīñ

maiñ barāmad kartā aaya huuñ zamīn-o-āsmāñ

aaj kyā hai kaise zambīl-e-hunar meñ kuchh nahīñ

jis ne kī haiñ umr bhar bas zaat kī ġhavvāsiyāñ

vo to phir samjhegā ki rang-e-digar meñ kuchh nahīñ

ziist kā peñDā huā yā do qadam rasta huā

niiñd meñ chalte rahe ho to safar meñ kuchh nahīñ

chup kī chhāñv thaam kar jaltā rahe sūraj tale

jab parinde hī nahīñ to phir shajar meñ kuchh nahīñ

lauT jaao zindagānī ke haqā.eq kī taraf

in hikāyāt-e-tavīl-o-muḳhtasar meñ kuchh nahīñ

dekh lo āḳhir yahī laa.ī mujhe tā-ba-falak

log kahte the ki ab is rah-guzar meñ kuchh nahīñ

jaise dariyā ho kisī gahre samundar meñ 'zafar'

aaj us manzil pe pahuñchā huuñ jidhar maiñ kuchh nahīñ

mujh mein har tufan hai aks-e-nazar mein kuchh nahin

dil ki sozish dekhiye to chashm-e-tar mein kuchh nahin

raat ka sara samundar par kar aai magar

aagahi ke pas taid-e-sahar mein kuchh nahin

main baramad karta aaya hun zamin-o-asman

aaj kya hai kaise zambil-e-hunar mein kuchh nahin

jis ne ki hain umr bhar bas zat ki ghawwasiyan

wo to phir samjhega ki rang-e-digar mein kuchh nahin

zist ka penDa hua ya do qadam rasta hua

nind mein chalte rahe ho to safar mein kuchh nahin

chup ki chhanw tham kar jalta rahe suraj tale

jab parinde hi nahin to phir shajar mein kuchh nahin

lauT jao zindagani ke haqaeq ki taraf

in hikayat-e-tawil-o-muKHtasar mein kuchh nahin

dekh lo aaKHir yahi lai mujhe ta-ba-falak

log kahte the ki ab is rah-guzar mein kuchh nahin

jaise dariya ho kisi gahre samundar mein 'zafar'

aaj us manzil pe pahuncha hun jidhar main kuchh nahin