mujh mein se mere jubba-o-dastar nafi kar

mujh meñ se mire jubba-o-dastār nafī kar

rah jā.ūñ agar baaqī to tashrīh mirī kar

sab ilm-o-hunar bhuul ke bachpan meñ chalā jā.ūñ

ai sāhab-e-sahar aisī koī jādūgarī kar

dīvāroñ se baTte haiñ ḳhirad-mandoñ ke ḳhitte

tū dasht-e-junūñ meñ na ye dīvār khaḌī kar

ik qāfila pyāsoñ kā guzarnā hai yahāñ se

ai dasht-e-balā apne sarāpā ko nirī kar

maiñ ghar meñ hī piitā huuñ magar yāroñ kī ḳhātir

ghar se tire maiḳhāne meñ aa jaatā huuñ pī kar

ik chaak garebāñ meñ hai ik chaak hai dil meñ

kyā hogā faqat chāk-e-garebān ko sī kar

jo zulm kī rah par haiñ unheñ raah se bhaTkā

achchhā bhī koī kaam tū ai tīra-shabī kar

gar kuchh bhī nahīñ paas to miTTī se hī bhar le

ai sāhab-e-ḳhairāt tū dāman na tahī kar

mujh mein se mere jubba-o-dastar nafi kar

rah jaun agar baqi to tashrih meri kar

sab ilm-o-hunar bhul ke bachpan mein chala jaun

ai sahab-e-sahar aisi koi jadugari kar

diwaron se baTte hain KHirad-mandon ke KHitte

tu dasht-e-junun mein na ye diwar khaDi kar

ek qafila pyason ka guzarna hai yahan se

ai dasht-e-bala apne sarapa ko niri kar

main ghar mein hi pita hun magar yaron ki KHatir

ghar se tere maiKHane mein aa jata hun pi kar

ek chaak gareban mein hai ek chaak hai dil mein

kya hoga faqat chaak-e-gareban ko si kar

jo zulm ki rah par hain unhen rah se bhaTka

achchha bhi koi kaam tu ai tira-shabi kar

gar kuchh bhi nahin pas to miTTi se hi bhar le

ai sahab-e-KHairaat tu daman na tahi kar