mujh mein soe hue mahtab se kam waqif hai

mujh meñ so.e hue māhtāb se kam vāqif hai

tū mirī aañkh ke tālāb se kam vāqif hai

buġhz-e-a.adā ḳhū-e-ahbāb se kam vāqif hai

jo mire halqa-e-arbāb se kam vāqif hai

satvat-e-qasr-e-shahī dhoke meñ rakhtā hai ki jo

azmat-e-gumbad-o-mehrāb se kam vāqif hai

ishq kī chāhiye ta.alīm abhī aur use

jo mohabbat adab ādāb se kam vāqif hai

ziist karne ko bahut chashm-e-fusūñ-kār mujhe

vo mire ishq ke zartāb se kam vāqif hai

ma.anavī taur par us pe maiñ mukammal nā khulī

vo mirī zaat ke eraab se kam vāqif hai

tujh pe maiñ kholuñgī ik din sabhī aurāq-e-jamāl

tū abhī husn ke abvāb se kam vāqif hai

kyā banegā jo nā Tal paa.ī balā-e-furqat

hijr to vasl ke asbāb se kam vāqif hai

ek hī shaḳhs kā kartī hai adab dhaḌkan bhī

dil to duniyā tire ādāb se kam vāqif hai

itnā poshīda use rakkhā hai 'amabar' sab se

aañkh apnī bhī mire ḳhvāb se kam vāqif hai

mujh mein soe hue mahtab se kam waqif hai

tu meri aankh ke talab se kam waqif hai

bughz-e-ada KHu-e-ahbab se kam waqif hai

jo mere halqa-e-arbab se kam waqif hai

satwat-e-qasr-e-shahi dhoke mein rakhta hai ki jo

azmat-e-gumbad-o-mehrab se kam waqif hai

ishq ki chahiye talim abhi aur use

jo mohabbat adab aadab se kam waqif hai

zist karne ko bahut chashm-e-fusun-kar mujhe

wo mere ishq ke zartab se kam waqif hai

manawi taur par us pe main mukammal na khuli

wo meri zat ke erab se kam waqif hai

tujh pe main kholungi ek din sabhi auraq-e-jamal

tu abhi husn ke abwab se kam waqif hai

kya banega jo na Tal pai bala-e-furqat

hijr to wasl ke asbab se kam waqif hai

ek hi shaKHs ka karti hai adab dhaDkan bhi

dil to duniya tere aadab se kam waqif hai

itna poshida use rakkha hai 'amabar' sab se

aankh apni bhi mere KHwab se kam waqif hai