mujh par nigah-e-gardish-e-dauran nahin rahi

mujh par nigāh-e-gardish-e-daurāñ nahīñ rahī

shāyad kisī kī zulf-e-pareshāñ nahīñ rahī

vahshat tak aa gayā hai mohabbat kā silsila

ab mujh ko fikr-e-jeb-o-garībāñ nahīñ rahī

mere jigar meñ ḳhuun ke qatre nahīñ rahe

un kī nazar meñ barash-e-pinhāñ nahīñ rahī

zauq-e-talab se terī ināyāt baḌh ga.iiñ

merī nazar meñ vus.at-e-dāmāñ nahīñ rahī

dil yuuñ bujhā bujhā sā hī kho kar tumhārī yaad

mahfil meñ jaise sham-e-farozāñ nahīñ rahī

kis darja dil-shikan hai gulistāñ kā inqalāb

bulbul bhī ab chaman meñ ġhazal-ḳhvāñ nahīñ rahī

'iqbāl' sard ho ga.ī bazm-e-hayāt bhī

jab se diloñ meñ ātish-e-sozāñ nahīñ rahī

mujh par nigah-e-gardish-e-dauran nahin rahi

shayad kisi ki zulf-e-pareshan nahin rahi

wahshat tak aa gaya hai mohabbat ka silsila

ab mujh ko fikr-e-jeb-o-gariban nahin rahi

mere jigar mein KHun ke qatre nahin rahe

un ki nazar mein barash-e-pinhan nahin rahi

zauq-e-talab se teri inayat baDh gain

meri nazar mein wusat-e-daman nahin rahi

dil yun bujha bujha sa hi kho kar tumhaari yaad

mahfil mein jaise sham-e-farozan nahin rahi

kis darja dil-shikan hai gulistan ka inqalab

bulbul bhi ab chaman mein ghazal-KHwan nahin rahi

'iqbaal' sard ho gai bazm-e-hayat bhi

jab se dilon mein aatish-e-sozan nahin rahi