مجھ پہ احساں کسی کا تھا ہی نہیں

مجھ پہ احساں کسی کا تھا ہی نہیں

سر کہیں پر کبھی جھکا ہی نہیں

زندگی کیا ہے جانتا ہی نہیں

پیار جس نے کبھی کیا ہی نہیں

تجھ سے ہٹ کر وجود عالم کا

دل کسی طور مانتا ہی نہیں

مال و زر کے سبھی ہیں دیوانے

پیار کو کوئی پوچھتا ہی نہیں

روپ کیا رنگ کیا محبت کیا

سب ہے بے کار اگر وفا ہی نہیں

اس نے جو چاہا بس ہوا وہ ہی

اپنا چاہا کبھی ہوا ہی نہیں

حال سارا لکھا تھا چہرے پر

اس نے چہرہ مرا پڑھا ہی نہیں

زندگی اب بتا تجھے کیا دوں

وقت رخصت تو کچھ بچا ہی نہیں

ڈھل نہ جائے جو شام تک یارو

ایسا سورج کبھی اگا ہی نہیں

تجھ سے بچھڑا تو ساز دل اے دوست

ایسا ٹوٹا کہ پھر جڑا ہی نہیں

رہ گئیں بس لکھی کتابوں میں

میری غزلوں کو سر ملا ہی نہیں

اک اشارے پہ جان دے دیتا

تم نے گلشنؔ سے کچھ کہا ہی نہیں