mujh pe ilzam lagate ho lagae jao

mujh pe ilzām lagāte ho lagā.e jaao

ḳhūn-e-dil apnā jalāte ho jalā.e jaao

hijr kī shab koī āsān nahīñ hotī hai

ashk tum apne bahāte ho bahā.e jaao

ishq-e-kāmil kī zamānat tumheñ maiñ detā huuñ

ye mirā sher jo tum gaate ho gaa.e jaao

qais ke dasht meñ laate ho savārī apnī

ya.anī yuuñ dhuum machāte ho machā.e jaao

jhiil ke paanī meñ do sho.ala-numā hoñT ġhazab

haa.e kyā aag lagāte ho lagā.e jaao

mere ash.ār jo samjhe na vo mujh ko samjhe

yaar tum ḳhud ko thakāte ho thakā.e jaao

ham ne sozish pe mohabbat kī binā rakhī hai

tum agar taaj banāte ho banā.e jaao

'dānish' asrī kā to maslak hai faqat dasht kī ḳhaak

tum agar ghar se nibhāte ho nibhā.e jaao

mujh pe ilzam lagate ho lagae jao

KHun-e-dil apna jalate ho jalae jao

hijr ki shab koi aasan nahin hoti hai

ashk tum apne bahate ho bahae jao

ishq-e-kaamil ki zamanat tumhein main deta hun

ye mera sher jo tum gate ho gae jao

qais ke dasht mein late ho sawari apni

yani yun dhum machate ho machae jao

jhil ke pani mein do shoala-numa honT ghazab

hae kya aag lagate ho lagae jao

mere ashaar jo samjhe na wo mujh ko samjhe

yar tum KHud ko thakate ho thakae jao

hum ne sozish pe mohabbat ki bina rakhi hai

tum agar taj banate ho banae jao

'danish' asri ka to maslak hai faqat dasht ki KHak

tum agar ghar se nibhate ho nibhae jao