mujh pe kaisa ye muqaddar ka karam hai dekho

mujh pe kaisā ye muqaddar kā karam hai dekho

sub.h-e-ummīd bhī ab shām-e-alam hai dekho

raah kā ḳhauf na andesha-e-gumrāhī hai

rahnumā naqsh-e-kaf-e-pā-e-sanam hai dekho

vo mirā haal jo pūchheñ to batānā un se

dard pahlū meñ ziyāda hai na kam hai dekho

kahīñ aisā to nahīñ ham unheñ yaad aate haiñ

dil bhī hairān hai aur aañkh bhī nam hai dekho

jab se us dar pe jhukā.ī hai jabīñ ham ne 'adīb'

ḳhvāhish-e-dair na armān-e-haram hai dekho

mujh pe kaisa ye muqaddar ka karam hai dekho

subh-e-ummid bhi ab sham-e-alam hai dekho

rah ka KHauf na andesha-e-gumrahi hai

rahnuma naqsh-e-kaf-e-pa-e-sanam hai dekho

wo mera haal jo puchhen to batana un se

dard pahlu mein ziyaada hai na kam hai dekho

kahin aisa to nahin hum unhen yaad aate hain

dil bhi hairan hai aur aankh bhi nam hai dekho

jab se us dar pe jhukai hai jabin hum ne 'adib'

KHwahish-e-dair na arman-e-haram hai dekho