مجھ پہ رسوائی کا الزام لگایا گیا ہے

مجھ پہ رسوائی کا الزام لگایا گیا ہے

تیر سینے پہ نہیں دل پہ چلایا گیا ہے

بے سبب تو نہیں یوں ہم سے کنارہ کرنا

تیرے احساس میں لازم کوئی آیا گیا ہے

تیری اس سرد نگاہی کے سبب جان حیات

میرے انفاس میں طوفان اٹھایا گیا ہے

اپنے خوابوں کا جہاں ہم سے نہ بن پایا کبھی

اور اک کن سے دو عالم کو بنایا گیا ہے

خطرہ لاحق ہے تو انسان کو انسان سے ہے

اور ان لوگوں کو اشراف بتایا گیا ہے

اپنی محفل سے فراموش نہ کر پائے ہمیں

پا بجولاں ہی سہی ہم کو بلایا گیا ہے

کہیں ذرے میں ہے عالم کہیں عالم ذرہ

حسن خلقت کا عجب کھیل دکھایا گیا ہے

اب تخیل کی مسافت سے پلٹ آؤ ظہیرؔ

حد امکاں سے بھی آگے تمہیں پایا گیا ہے