mujh pe ruswai ka ilzam lagaya gaya hai

mujh pe rusvā.ī kā ilzām lagāyā gayā hai

tiir siine pe nahīñ dil pe chalāyā gayā hai

be-sabab to nahīñ yuuñ ham se kināra karnā

tere ehsās meñ lāzim koī aayā gayā hai

terī is sard-nigāhī ke sabab jān-e-hayāt

mere anfās meñ tūfān uThāyā gayā hai

apne ḳhvāboñ kā jahāñ ham se na ban paayā kabhī

aur ik kun se do-‘ālam ko banāyā gayā hai

ḳhatra lāhaq hai to insān ko insān se hai

aur in logoñ ko ashrāf batāyā gayā hai

apnī mahfil se farāmosh na kar paa.e hameñ

pā-ba-jaulāñ hī sahī ham ko bulāyā gayā hai

kahīñ zarre meñ hai 'ālam kahīñ 'ālam zarra

husn-e-ḳhilqat kā 'ajab khel dikhāyā gayā hai

ab taḳhayyul kī masāfat se palaT aao 'zahīr'

hadd-e-imkāñ se bhī aage tumheñ paayā gayā hai

mujh pe ruswai ka ilzam lagaya gaya hai

tir sine pe nahin dil pe chalaya gaya hai

be-sabab to nahin yun hum se kinara karna

tere ehsas mein lazim koi aaya gaya hai

teri is sard-nigahi ke sabab jaan-e-hayat

mere anfas mein tufan uThaya gaya hai

apne KHwabon ka jahan hum se na ban paya kabhi

aur ek kun se do-‘alam ko banaya gaya hai

KHatra lahaq hai to insan ko insan se hai

aur in logon ko ashraf bataya gaya hai

apni mahfil se faramosh na kar pae hamein

pa-ba-jaulan hi sahi hum ko bulaya gaya hai

kahin zarre mein hai 'alam kahin 'alam zarra

husn-e-KHilqat ka 'ajab khel dikhaya gaya hai

ab taKHayyul ki masafat se palaT aao 'zahir'

hadd-e-imkan se bhi aage tumhein paya gaya hai