مجھ پہ وہ کچھ اس قدر چھاتا رہا

مجھ پہ وہ کچھ اس قدر چھاتا رہا

اپنے مٹ جانے کا غم جاتا رہا

گفتگو شب بھر رہی ہے چاند سے

رات بھر مجھ کو وہ یاد آتا رہا

دل کے کہنے میں سدا بھٹکا کیے

کوئی جگنو راہ دکھلاتا رہا

عشق میں وہ آج خود برباد ہے

عمر بھر جو مجھ کو سمجھاتا رہا

دل کی تنہائی سوا ہوتی رہی

جس قدر وہ ناچتا گاتا رہا

میری زلفوں میں وہ الجھا اس قدر

وصل کی شب ان کو سلجھاتا رہا

برف کا ٹکڑا نہیں تھا سنگ تھا

کوئی ناداں اس کو پگھلاتا رہا