mujh sa bhi koi ishq mein hai bad-guman nahin

mujh sā bhī koī ishq meñ hai bad-gumāñ nahīñ

kyā rashk dekh kar mujhe rañg-e-ḳhizāñ nahīñ

āñkhoñ se dekh kar tujhe sab mānñā paḌā

kahte the jo hamesha chuneñ hai chunāñ nahīñ

uTh kar sahar ko sajda-e-mastāna ke sivā

taa.at qubūl ḳhātir-e-pīr-e-muġhāñ nahīñ

afsurda dil ho dar dar-e-rahmat nahīñ hai band

kis din khulā huā dar-e-pīr-e-muġhāñ nahīñ

ai jazb-e-shauq rahm ki madd-e-nazar hai yaar

jā saktī vaañ talak nigah-e-nā-tavāñ nahīñ

shab us ko hāl-e-dil ne jatāyā kuchh is tarah

haiñ lab to kyā nigah bhī huī tarjumāñ nahīñ

kaTtī kisī tarah se nahīñ ye shab-e-firāq

shāyad ki gardish aaj tujhe āsmāñ nahīñ

achchhā huī nikal ga.ī āh-e-hazīñ ke saath

ik qahr thī balā thī qayāmat thī jaañ nahīñ

jaane hai dil falak kā mirī saḳht-jāniyāñ

un nā-tavāniyoñ ko pahuñchtī tavāñ nahīñ

kahtā huuñ us se kuchh maiñ nikaltā hai muñh se kuchh

kahne ko yuuñ to haigī zabāñ aur zabāñ nahīñ

mahkā huā hai bait-e-huzan dekhnā koī

aayā nasīm-e-misr kā ho kārvāñ nahīñ

lab band huuñ to rauzan-e-sīna ko kyā karūñ

thamtā to mujh se nāla-e-ātish-ināñ nahīñ

kyā kuchh na kar dikhā.ūñ par ik din ke vāste

miltā bhī ham ko mansab-e-haft-āsmāñ nahīñ

vo shāḳh-e-naḳhl-e-ḳhushk huuñ maiñ kunj-e-bāġh meñ

dekhe hai bhuul kar bhī jise bāġhbāñ nahīñ

be-vaqt aa.e dair meñ kyā shorisheñ kareñ

ham pīr-o-pīr-e-mai-kada bhī naujavāñ nahīñ

'āzurda' ne paḌhī ġhazal ik mai-kade meñ kal

vo sāf-tar ki sīna-e-pīr-e-muġhāñ nahīñ

mujh sa bhi koi ishq mein hai bad-guman nahin

kya rashk dekh kar mujhe rang-e-KHizan nahin

aankhon se dekh kar tujhe sab manna paDa

kahte the jo hamesha chunen hai chunan nahin

uTh kar sahar ko sajda-e-mastana ke siwa

taat qubul KHatir-e-pir-e-mughan nahin

afsurda dil ho dar dar-e-rahmat nahin hai band

kis din khula hua dar-e-pir-e-mughan nahin

ai jazb-e-shauq rahm ki madd-e-nazar hai yar

ja sakti wan talak nigah-e-na-tawan nahin

shab us ko haal-e-dil ne jataya kuchh is tarah

hain lab to kya nigah bhi hui tarjuman nahin

kaTti kisi tarah se nahin ye shab-e-firaq

shayad ki gardish aaj tujhe aasman nahin

achchha hui nikal gai aah-e-hazin ke sath

ek qahr thi bala thi qayamat thi jaan nahin

jaane hai dil falak ka meri saKHt-jaaniyan

un na-tawaniyon ko pahunchti tawan nahin

kahta hun us se kuchh main nikalta hai munh se kuchh

kahne ko yun to haigi zaban aur zaban nahin

mahka hua hai bait-e-huzan dekhna koi

aaya nasim-e-misr ka ho karwan nahin

lab band hun to rauzan-e-sina ko kya karun

thamta to mujh se nala-e-atish-inan nahin

kya kuchh na kar dikhaun par ek din ke waste

milta bhi hum ko mansab-e-haft-asman nahin

wo shaKH-e-naKHl-e-KHushk hun main kunj-e-bagh mein

dekhe hai bhul kar bhi jise baghban nahin

be-waqt aae dair mein kya shorishen karen

hum pir-o-pir-e-mai-kada bhi naujawan nahin

'azurda' ne paDhi ghazal ek mai-kade mein kal

wo saf-tar ki sina-e-pir-e-mughan nahin