mujhse ab saf bhi ho ja yunhi yar aap se aap

mujh se ab saaf bhī ho jā yūñhī yaar aap se aap

jis tarah hai tirī ḳhātir meñ ġhubār aap se aap

kab kahā ātish-e-furqat se jalāyā tū ne

haiñ mire nāla-e-dil sā.iqa-bār aap se aap

ḳhaar tadbīr hai pesh-e-gul-e-taqdīr 'abas

vaqt par baaġh meñ aatī hai bahār aap se aap

donoñ 'ālam meñ agar ek nahīñ sho.abada-bāz

jam' kyuuñ kar hue azdād ye chaar aap se aap

nahīñ aatā jo vo ḳhurshīd mire ghar meñ na aa.e

sub.h ho jā.egī āḳhir shab-e-tār aap se aap

kuchh shikāyat nahīñ ishq-e-kamar-e-nāzuk kī

ho gayā huuñ maiñ sanam zār-o-nazār aap se aap

o vajūd-e-chaman-ārā-e-azal ke munkir

ḳhud-baḳhud gul hue maujūd na ḳhaar aap se aap

surḳh poshāk pahan kar vo sahī qad jo gayā

jal uThe sarv-e-chaman misl-e-chinār aap se aap

zulf ko chhū ke paḌā hai jo balā meñ ai dil

kaaT khātā hai kisī ko koī maar aap se aap

kuchh tirī teġh-e-jafā kī nahīñ taqsīr ai gul

sūrat-e-ġhuncha mirā dil hai figār aap se aap

ġhair kā muñh hai ki le bose tire o zālim

nīlgūñ ho ga.e hoñge ye ezaar aap se aap

nāla-kash misl-e-jaras kyuuñ hai 'abas ai majnūñ

sabr kar aa.egī jammāza-savār aap se aap

mujh se ab saf bhi ho ja yunhi yar aap se aap

jis tarah hai teri KHatir mein ghubar aap se aap

kab kaha aatish-e-furqat se jalaya tu ne

hain mere nala-e-dil saiqa-bar aap se aap

KHar tadbir hai pesh-e-gul-e-taqdir 'abas

waqt par bagh mein aati hai bahaar aap se aap

donon 'alam mein agar ek nahin shoabada-baz

jam' kyun kar hue azdad ye chaar aap se aap

nahin aata jo wo KHurshid mere ghar mein na aae

subh ho jaegi aaKHir shab-e-tar aap se aap

kuchh shikayat nahin ishq-e-kamar-e-nazuk ki

ho gaya hun main sanam zar-o-nazar aap se aap

o wajud-e-chaman-ara-e-azal ke munkir

KHud-baKHud gul hue maujud na KHar aap se aap

surKH poshak pahan kar wo sahi qad jo gaya

jal uThe sarw-e-chaman misl-e-chinar aap se aap

zulf ko chhu ke paDa hai jo bala mein ai dil

kaT khata hai kisi ko koi mar aap se aap

kuchh teri tegh-e-jafa ki nahin taqsir ai gul

surat-e-ghuncha mera dil hai figar aap se aap

ghair ka munh hai ki le bose tere o zalim

nilgun ho gae honge ye ezar aap se aap

nala-kash misl-e-jaras kyun hai 'abas ai majnun

sabr kar aaegi jammaza-sawar aap se aap