mujhse mat puchh mera haal-e-darun rahne de

mujh se mat pūchh mirā hāl-e-darūñ rahne de

sun ke Tapkegā tirī āñkhoñ se ḳhuuñ rahne de

fasl-e-gul dasht-e-ḳhirad meñ hai agarche maujūd

mujh ko pā-basta-e-zanjīr-e-junūñ rahne de

tū karam mujh pe karegā to jatā.egā zarūr

haal jo merā zubūñ hai to zubūñ rahne de

sādgī sī koī zīnat nahīñ hotī jānāñ

apnī in shoḳh adāoñ kā fusūñ rahne de

chheḌ kar phir vahī maazī ke purāne qisse

mujh se mat chhīn mire dil kā sukūñ rahne de

ai zamāna maiñ tire saath badalne se rahā

ab maiñ achchhā ki burā jaisā bhī huuñ rahne de

mujh se mat puchh mera haal-e-darun rahne de

sun ke Tapkega teri aankhon se KHun rahne de

fasl-e-gul dasht-e-KHirad mein hai agarche maujud

mujh ko pa-basta-e-zanjir-e-junun rahne de

tu karam mujh pe karega to jataega zarur

haal jo mera zubun hai to zubun rahne de

sadgi si koi zinat nahin hoti jaanan

apni in shoKH adaon ka fusun rahne de

chheD kar phir wahi mazi ke purane qisse

mujh se mat chhin mere dil ka sukun rahne de

ai zamana main tere sath badalne se raha

ab main achchha ki bura jaisa bhi hun rahne de