mujhse na jaane kaun si aisi KHata hui

mujh se na jaane kaun sī aisī ḳhatā huī

shāyad vafā ke jurm meñ mujh ko sazā huī

ye ġham nahīñ ki aah mirī nā-rasā huī

un kī jafā hī merī vafā kā sila huī

guzrā na zindagī meñ koī din sukūn se

yā-rab mujhe hayāt ye kaisī atā huī

manzil pe ārzūoñ ne dāman chhuḌā liyā

hasrat kabhī bhī dil se na mere judā huī

ummīd-o-ġham bhī rahte haiñ dil meñ alag alag

kab dard-o-ārzū kī kasak ek-jā huī

har roz mai-kadoñ meñ rahī hāzirī merī

zāhid tirī namāz to aksar qazā huī

gumrāhiyoñ meñ itnī lagīñ mujh ko Thokareñ

be-rāh-ravī aaj mirī rāh-numā huī

'sālik' mire sabab se huā dūsroñ kā naam

rusvā.ī jab junūñ meñ mirī jā-ba-jā huī

mujh se na jaane kaun si aisi KHata hui

shayad wafa ke jurm mein mujh ko saza hui

ye gham nahin ki aah meri na-rasa hui

un ki jafa hi meri wafa ka sila hui

guzra na zindagi mein koi din sukun se

ya-rab mujhe hayat ye kaisi ata hui

manzil pe aarzuon ne daman chhuDa liya

hasrat kabhi bhi dil se na mere juda hui

ummid-o-gham bhi rahte hain dil mein alag alag

kab dard-o-arzu ki kasak ek-ja hui

har roz mai-kadon mein rahi haziri meri

zahid teri namaz to aksar qaza hui

gumrahiyon mein itni lagin mujh ko Thokaren

be-rah-rawi aaj meri rah-numa hui

'salik' mere sabab se hua dusron ka nam

ruswai jab junun mein meri ja-ba-ja hui