مجھ سے پوچھے ہیں وہ کہ کیا ہے دل

مجھ سے پوچھے ہیں وہ کہ کیا ہے دل

کیا کہوں خانۂ خدا ہے دل

کیا کہوں کیا بری بلا ہے دل

اس کی زلفوں سے جا گتھا ہے دل

تیری فرقت میں اے بت دمباز

ہو کے آنکھوں سے خوں بہا ہے دل

مل کے اس سے ہوا مرا دشمن

دیکھ کیا سخت بے وفا ہے دل

جب سے عاشق ہوا ہوں اس کا میں

رات دن صرف مدعا ہے دل

عنصر خاک سرد دل یہ گرم

کون سی خاک سے بنا ہے دل

اے مہوس جو یار کے در پر

خاک ہوئے تو کیمیا ہے دل

غم ہجراں میں ہو کے قطرۂ خوں

نوک مژگاں پہ آ رہا ہے دل

سینہ میں اک کھٹک سی ہے بس اور

ہم نہیں جانتے کہ کیا ہے دل

یاد میں اس کے تیر مژگاں کے

ہدف ناوک بلا ہے دل

تجھ سے کوئی بھلا ملے کیوں کر

تیرا ہر حرف خود جدا ہے دل

قدر دل عیشؔ کوئی کیا جانے

مخزن راز کبریا ہے دل