mujhse puchhe hain wo ki kya hai dil

mujh se pūchhe haiñ vo ki kyā hai dil

kyā kahūñ ḳhāna-e-ḳhudā hai dil

kyā kahūñ kyā burī balā hai dil

us kī zulfoñ se jā guthā hai dil

terī furqat meñ ai but-e-dam-bāz

ho ke āñkhoñ se ḳhuuñ bahā hai dil

mil ke us se huā mirā dushman

dekh kyā saḳht bevafā hai dil

jab se āshiq huā huuñ us kā maiñ

rāt-din sirf mudda.ā hai dil

unsur-e-ḳhāk sard dil ye garm

kaun sī ḳhaak se banā hai dil

ai muhavvis jo yaar ke dar par

ḳhaak ho.e to kīmiyā hai dil

ġham-e-hijrāñ meñ ho ke qatra-e-ḳhūñ

nok-e-mizhgāñ pe aa rahā hai dil

siine meñ ik khaTak sī hai bas aur

ham nahīñ jānte ki kyā hai dil

yaad meñ us ke tīr-e-mizhgāñ ke

hadaf-e-nāvak-e-balā hai dil

tujh se koī bhalā mile kyuuñ kar

terā har harf ḳhud judā hai dil

qadr-e-dil 'aish' koī kyā jaane

maḳhzan-e-rāz-e-kibriyā hai dil

mujh se puchhe hain wo ki kya hai dil

kya kahun KHana-e-KHuda hai dil

kya kahun kya buri bala hai dil

us ki zulfon se ja gutha hai dil

teri furqat mein ai but-e-dam-baz

ho ke aankhon se KHun baha hai dil

mil ke us se hua mera dushman

dekh kya saKHt bewafa hai dil

jab se aashiq hua hun us ka main

raat-din sirf muddaa hai dil

unsur-e-KHak sard dil ye garm

kaun si KHak se bana hai dil

ai muhawwis jo yar ke dar par

KHak hoe to kimiya hai dil

gham-e-hijran mein ho ke qatra-e-KHun

nok-e-mizhgan pe aa raha hai dil

sine mein ek khaTak si hai bas aur

hum nahin jaante ki kya hai dil

yaad mein us ke tir-e-mizhgan ke

hadaf-e-nawak-e-bala hai dil

tujh se koi bhala mile kyun kar

tera har harf KHud juda hai dil

qadr-e-dil 'aish' koi kya jaane

maKHzan-e-raaz-e-kibriya hai dil