mujhe apni bazm-e-hayat mein abhi gham uThane ka shauq hai

mujhe apnī bazm-e-hayāt meñ abhī ġham uThāne kā shauq hai

ye to us divāne kī baat hai jise duub jaane kā shauq hai

tirī har nazar meñ haiñ shoḳhiyāñ mirī har nigāh meñ narmiyāñ

tujhe zaḳhm dene kī 'ādateñ mujhe zaḳhm khāne kā shauq hai

mire dil pe girtī haiñ bijliyāñ yuuñ na muskurā jo kahā gayā

tirā ye javāb ki kyā karūñ mujhe muskurāne kā shauq hai

mirī zindagī kī ye riit thī ki qadam qadam mirī jiit thī

maiñ to jiit jiit ke thak chukā mujhe haar jaane kā shauq hai

mujhe masjidoñ meñ na le chalo mujhe mandiroñ se alag rakho

abhī husn ke hī huzūr meñ mujhe sar jhukāne kā shauq hai

mujhe apni bazm-e-hayat mein abhi gham uThane ka shauq hai

ye to us diwane ki baat hai jise dub jaane ka shauq hai

teri har nazar mein hain shoKHiyan meri har nigah mein narmiyan

tujhe zaKHm dene ki 'adaten mujhe zaKHm khane ka shauq hai

mere dil pe girti hain bijliyan yun na muskura jo kaha gaya

tera ye jawab ki kya karun mujhe muskurane ka shauq hai

meri zindagi ki ye rit thi ki qadam qadam meri jit thi

main to jit jit ke thak chuka mujhe haar jaane ka shauq hai

mujhe masjidon mein na le chalo mujhe mandiron se alag rakho

abhi husn ke hi huzur mein mujhe sar jhukane ka shauq hai