mujhe bacha bhi liya chhoD kar chala bhi gaya

mujhe bachā bhī liyā chhoḌ kar chalā bhī gayā

vo mehrbāñ pas-e-gard-e-safar chalā bhī gayā

vagarna tang na thī 'ishq par ḳhudā kī zamīñ

kahā thā us ne to maiñ apne ghar chalā bhī gayā

koī yaqīñ na kare maiñ agar kisī ko batā.ūñ

vo uñgliyāñ thiiñ ki zaḳhm-e-jigar chalā bhī gayā

mire badan se phir aa.ī ga.e dinoñ kī mahak

agarche mausam-e-barg-o-samar chalā bhī gayā

havā kī tarah na dekhī mirī ḳhizāñ kī bahār

khilā ke phuul mirā ḳhush-nazar chalā bhī gayā

'ajīb raushaniyāñ thiiñ visāl ke us paar

maiñ us ke saath rahā aur udhar chalā bhī gayā

kal us ne sair karā.ī na.e jahānoñ kī

to ranj-e-nārasī-e-bāl-o-par chalā bhī gayā

mujhe bacha bhi liya chhoD kar chala bhi gaya

wo mehrban pas-e-gard-e-safar chala bhi gaya

wagarna tang na thi 'ishq par KHuda ki zamin

kaha tha us ne to main apne ghar chala bhi gaya

koi yaqin na kare main agar kisi ko bataun

wo ungliyan thin ki zaKHm-e-jigar chala bhi gaya

mere badan se phir aai gae dinon ki mahak

agarche mausam-e-barg-o-samar chala bhi gaya

hawa ki tarah na dekhi meri KHizan ki bahaar

khila ke phul mera KHush-nazar chala bhi gaya

'ajib raushaniyan thin visal ke us par

main us ke sath raha aur udhar chala bhi gaya

kal us ne sair karai nae jahanon ki

to ranj-e-narasi-e-baal-o-par chala bhi gaya