mujhe dair bhi ho kyun kar na haram ki tarah pyara

mujhe dair bhī ho kyuuñ kar na haram kī tarah pyārā

tū yahāñ bhī jalva-ārā tū vahāñ bhī jalva-ārā

hai ajiib ye tamāshā hai ajiib ye nazārā

mirī aahoñ kā sharāra mire āñsuoñ kā dhārā

vo payām-e-shām-e-ġham ho ki naved-e-sub.h-e-ishrat

mujhe ye bhī hai gavārā mujhe vo bhī hai gavārā

yūñhī mujh ko Dūbne do inhīñ mauj-hā-e-ġham meñ

ki muhīt-e-ġham kā shāyad abhī duur hai kinārā

na faroġh-e-rū-e-tābāñ na nigāh-e-nūr-afshāñ

mire iztirāb-e-dil se mirā raaz āshkārā

koī kyā samajh sakegā ye hai faiz-e-ishq jis ne

mujhe is tarah bigāḌā mujhe is tarah sañvārā

koī chiiz bhī hai qismat koī shai bhī hai muqaddar

ki maiñ apnī koshishoñ meñ yahāñ bār-bār haarā

ye hujūm-e-nā-umīdī ye vufūr-e-nā-murādī

huuñ ajab musībatoñ meñ maiñ musībatoñ kā maarā

mujhe ilm is kā kyā thā mujhe kyā ḳhabar thī 'najmī'

ki mujhī ko phūñk degā mire ishq kā sharārā

mujhe dair bhi ho kyun kar na haram ki tarah pyara

tu yahan bhi jalwa-ara tu wahan bhi jalwa-ara

hai ajib ye tamasha hai ajib ye nazara

meri aahon ka sharara mere aansuon ka dhaara

wo payam-e-sham-e-gham ho ki nawed-e-subh-e-ishrat

mujhe ye bhi hai gawara mujhe wo bhi hai gawara

yunhi mujh ko Dubne do inhin mauj-ha-e-gham mein

ki muhit-e-gham ka shayad abhi dur hai kinara

na farogh-e-ru-e-taban na nigah-e-nur-afshan

mere iztirab-e-dil se mera raaz aashkara

koi kya samajh sakega ye hai faiz-e-ishq jis ne

mujhe is tarah bigaDa mujhe is tarah sanwara

koi chiz bhi hai qismat koi shai bhi hai muqaddar

ki main apni koshishon mein yahan bar-bar haara

ye hujum-e-na-umidi ye wufur-e-na-muradi

hun ajab musibaton mein main musibaton ka mara

mujhe ilm is ka kya tha mujhe kya KHabar thi 'najmi'

ki mujhi ko phunk dega mere ishq ka sharara