mujhe ilzam na de tark-e-shakebai ka

mujhe ilzām na de tark-e-shakebā.ī kā

mujh se poshīda hai aalam tirī ra.anā.ī kā

māna-e-jalvagarī ḳhauf hai rusvā.ī kā

bas usī par tumheñ da.avā hai zuleḳhā.ī kā

kyā kahūñ gar use e.ajāz-e-mohabbat na kahūñ

husn ḳhud mahv-e-tamāshā hai tamāshā.ī kā

ashk jo aañkh se bāhar nahīñ aane paatā

ā.īna hai mire jazbāt kī gahrā.ī kā

tere āġhosh meñ kyā jāniye kyā aalam ho

dil dhaḌaktā hai tasavvur se tamannā.ī kā

shikan-e-bistar-o-namnākī-e-bārish haiñ gavāh

pūchh lo un se fasāna shab-e-tanhā.ī kā

kashish-e-badr se chaḌhtā huā dariyā dekhā

allāh allāh vo aalam tirī añgḌā.ī kā

mujhe ilzam na de tark-e-shakebai ka

mujh se poshida hai aalam teri ranai ka

mana-e-jalwagari KHauf hai ruswai ka

bas usi par tumhein dawa hai zuleKHai ka

kya kahun gar use eajaz-e-mohabbat na kahun

husn KHud mahw-e-tamasha hai tamashai ka

ashk jo aankh se bahar nahin aane pata

aaina hai mere jazbaat ki gahrai ka

tere aaghosh mein kya jaaniye kya aalam ho

dil dhaDakta hai tasawwur se tamannai ka

shikan-e-bistar-o-namnaki-e-barish hain gawah

puchh lo un se fasana shab-e-tanhai ka

kashish-e-badr se chaDhta hua dariya dekha

allah allah wo aalam teri angDai ka